Kirish

Barqaror rivojlanish maqsadlari – bu 2015-yilning sentabr oyida  Birlashgan Millatlar Tashkilotining samitida butun dunyoda iqtisodiy, ijtimoiy va ekologik vaziyatni har tomonlama yaxshilash orqali butun insoniyatning hayot tarzini yaxshilash va turmush farovonligini oshirishga, adolatli, barqaror jamiyat qurishga qaratilgan global chaqirigʼidir. Barqaror rivojlanish sohasidagi turli mamlakatlarning tajribasi juda katta farq qilganligi sababli, 2030-yildagi yig‘ilish kun tartibining barcha maqsadlari va tegishli vazifalari umumiy, universal shaklda shakllantirilgan hamda qoida tariqasida aniq miqdoriy maqsadlar mavjud emas. Har bir mamlakat BRMni lokalizatsiya qilishi, yaʼni 2030-yilga moʼljallangan kun tartibidagi 169 ta vazifadan oʼzining rivojlanish ustuvorligi va moliyaviy imkoniyatlaridan kelib chiqib, milliy rivojlanish maqsadlarini ishlab chiqishi belgilangan. Mamlakatlar ushbu maqsadlarni oʼzining milliy sharoitlariga moslashtirishi, har bir vazifaga tegishli statistik koʼrsatkichlar uchun miqdoriy koʼrsatkichlarni aniqlashi hamda vazifalar va aniq miqdoriy koʼrsatkichlarni milliy strategik hujjatlarda belgilashi kerak.

Barqaror rivojlanish maqsadlarining milliy darajada bajarilishi boʼyicha shartlarini qabul qildi va 2030-yilgacha boʼlgan davrda barqaror rivojlanish sohasidagi milliy maqsad va vazifalarni belgilab oldi. O‘zbekiston Respublikasi Vazirlar Mahkamasining 83-sonli qarori asosida 2030-yilgacha bo‘lgan davr uchun 16 ta Barqaror rivojlanish milliy maqsadlari hamda ular bilan bog‘liq bo‘lgan 125 ta vazifalar tasdiqlandi. Oʼzbekiston Respublikasi Vazirlar Mahkamasi 841-son qarori qabul qilinib, har bir yo‘nalish bo‘yicha masʼul vazirlik va idoralar belgilandi. Shuningdek, hukumat darajasida Oʼzbekiston Respublikasi Bosh vazirining oʼrinbosari rahbarligida idoralararo Muvofiqlashtiruvchi kengash tuzildi va milliy BRMlarni amalga oshirish uchun tegishli «yoʼl xaritasi» qabul qilindi. BRM koʼrsatkichlari boʼyicha maʼlumotlarni monitoring qilish maqsadida nsdg.stat.uz sayti ishga tushirildi. Ushbu platforma mamlakatdagi BRMga erishishda mavjud vaziyat toʼgʼrisida maʼlumot toʼplash va umumlashtirish uchun yagona markaz hisoblanadi.

Barqaror Rivojlanish Maqsadlari (SDGs) yoki Global Maqsadlar bir-biriga bogʻlangan 17 ta maqsadlar toʻplami boʻlib, “hozirgi va kelajakda odamlar va sayyoramiz uchun tinchlik va farovonlik uchun umumiy reja” boʻlib xizmat qiladi.

Barqaror rivojlanish maqsadlari quyidagilar:

1. Qashshoqlikning barcha shakllariga barham berish.
2. Ochlikni tugatish, oziq-ovqat xavfsizligini ta’minlash va oziqlanishni yaxshilash hamda qishloq xo‘jaligining barqaror rivojlanishiga ko‘maklashish.
3. Sog‘lom turmush tarzini ta’minlash va barcha yoshdagi kishilarning farovonligiga ko‘maklashish.
4. Barchani qamrab oluvchi, teng huquqli hamda sifatli ta’limni ta’minlash va barcha uchun uzluksiz ta’lim olish imkoniyatini kengaytirish..
5. Gender tengligini ta’minlash, barcha ayol va qiz bolalarning huquq va imkoniyatlarini kengaytirish.
6. Barcha uchun xavfsiz suv zaxiralari va sanitariya vositalaridan foydalanish imkoniyatini ta’minlash.
7. Barcha uchun energiyaning arzon, ishonchli, barqaror va zamonaviy manbalaridan foydalanish imkoniyatini ta’minlash.
8. Keng qamrovli va barqaror iqtisodiy o‘sish hamda barcha uchun bandlik va munosib mehnat qilish imkoniyatlarini ta’minlashga ko‘maklashish.
9. Mustahkam infratuzilma yaratish, keng sanoatlashgan va innovatsiyalar bilan boyitilgan tizim joriy etilishiga ko‘maklashish.
10. Mamlakatlararo va ichki tengsizlik darajasini qisqartirish.
11. Shahar va aholi yashash joylarining ochiqligi, xavfsizligi, mustahkamligi va ekologik barqarorligini ta’minlash.
12. Oqilona iste‘mol qilish va ishlab chiqarish modellariga o‘tishni ta’minlash.
13. Iqlim o‘zgarishi va uning oqibatlariga qarshi kurashish bo‘yicha tezkor choralar ko‘rish.
14. Barqaror taraqqiyot yo‘lida okeanlar, dengizlar va dengiz zaxiralarini asrash va ulardan oqilona foydalanish.
15. O‘rmonlardan oqilona foydalanish, cho‘llashishga qarshi kurashish, yer tanazzuli holatlariga chek qo‘yish va yer unumdorligini qayta tiklash hamda biologik xilma-xillikning yo‘qolib ketish xavfini bartaraf etish.
16. Barqaror rivojlanish manfaatlari yo‘lida tinchliksevar va ochiq jamiyatlar qurilishiga ko‘maklashish, barcha uchun odil sudlov imkoniyatidan foydalanishni ta’minlash va barcha darajalarda samarali, hisobdor va keng ishtirokka asoslangan muassasalarni tashkil etish.
17. Barqaror rivojlanish manfaatlari yo‘lida global hamkorlikni faollashtirish.

So‘nggi yillarda universitetimiz hayotida ulkan o‘zgarishlar va yangilanishlar amalga oshirildi. Jumladan, universitetimizda hozirgi kunda 14 nafar akademiklar, 300 ga yaqin fan doktori va professorlar, 550 ga yaqin fan nomzodi va falsafa doktorlari, dotsentlar faoliyat olib borayotgani quvonarli hol, albatta. Universitetning kelajak besh yillik istiqbolli strategiyasida o‘quv jarayonini tubdan isloh qilish, ilmiy faoliyatini yanada takomillashtirish, universitetning xalqaro va milliy reytingdagi mavqeini oshirish va mustahkamlashni maqsad qilganmiz.

Buning uchun ta’lim sifatini yaxshilash, ilmiy va innovatsion izlanishlarni kengaytirish, xorijiy oliy ta’lim muassasalari bilan hamkorlikni rivojlantirish, xorij olimlari bilan ilmiy kollaboratsiyani kengaytirish, yoshlarimizning ilm-fan va ijodiy sohalarga keng jalb etish ishlarini yanada oshirish lozim. Universitetni jahon reytingida yuqori bo‘lgan Top-1000 oliy ta’lim muassasalari qatoriga kiritish, ilmiy salohiyatini oshirish yo‘lida barcha professor-o‘qituvchilar, yosh olimlar, magistrantlar va talabalarni vatanimiz va universitetimiz barqaror rivojlanishi uchun fidoiy va faol bo‘lishga chorlaniladi.